झापाली आवाज

पूर्वराष्ट्रपति भण्डारीलाई नेकपा एमालेले गणतन्त्र गौरव पदकबाट सम्मान गर्ने

काठमाडौं । नेकपा एमालेले पार्टीको हिरक जयन्ती महोत्सवमा गणतन्त्र गौरव पदकबाट पूर्वराष्ट्रपति विद्यादेवी भण्डारीलाई सम्मान गर्ने भएको छ ।

ललितपुरको गोदावरीमा चलिरहेको एमालेको राष्ट्रिय प्रतिनिधि परिषदको बैठकमा वरिष्ठ उपाध्यक्ष ईश्वर पोखरेलले भण्डारीलाई सम्मान गर्ने प्रस्ताव प्रस्तुत गर्नुभएको हो । जसमा प्रतिनिधिहरुले सहमति जनाउनु भएको थियो ।

प्रस्ताव प्रस्तुत गर्नुहुँदै पार्टीका वरिष्ठ उपाध्यक्ष पोखरेलले मुलुकको लोकतान्त्रिक आन्दोलनमा, कम्युनिष्ट आन्दोलनमा योगदान पुर्‍याएका र राष्ट्रिय स्वाभिमान रक्षाका खातिर अडान लिएका व्यक्तिहरुलाई सम्मान गर्ने घोषित योजनाअनुसार हिरक जयन्तीमा पूर्वराष्ट्रपति भण्डारीलाई सम्मान लागेको जानकारी दिनुभएको हो ।

‘‘पार्टीका पूर्वउपाध्यक्ष र दुई दुई पटक गणतन्त्र नेपालको राष्ट्रपति पदमा निर्वाचित हुनुभएको व्यक्ति, राष्ट्रपति पदमा निर्वाचित भएर पनि अत्यन्त चुनौतीपूर्ण अवस्थामा उहाँले महत्वपूर्ण ढंगले भूमिका खेल्नुभएको, अडान लिनुभएको र हामी सबैको एउटा गौरवको विषय बन्नुभएको, आदरणीय विद्यादेवी भण्डारीलाई हामीले गणतन्त्र गौरव पदकले सम्मान गर्ने प्रस्ताव यो राष्ट्रिय प्रतिनिधि परिषद्को बैठकबाट अघि बढाउँ’ पोखरेलले बैठकमा प्रस्ताव प्रस्तुत गर्दै भन्नु भएको थियो ।

उहाँको प्रस्तावलाई महाधिवेशन प्रतिनिधि परिषद्मा ध्वनीमतले पारित भएको जनाइएको छ । नेकपा एमालेले आज सोमवार अप्रिल २२ तारिक का दिन पार्टी स्थापनाको ७५औं वर्षगाँठ मनाउँदैछ ।

Scroll to Top